Məhəmməd Hacıyev
Məhəmməd Hacı oğlu Hacıyev
Borçalının öndər şəxsiyyətlərindən olan
Nayvəlinin nəticəsi, Hacı kişinin böyük oğlu, el ağsaqqalı.
Məhəmmədin atası, Nayvəlinin nəvəsi Hacı kişi XIX əsrin axırlarında anadan olub, 1922-ci ildə rəhmətə gedib.
Hacı kişi imkanlı, dövlətli adam olub. Xeyli mal-qarası, babalarından qalan sərvəti olub, ancaq sovet dövründə dövləti əlindən çıxıb, övladlarına torpaq sahəsi qalıb.
Hacı kişinin əmisi oğlu Pirverdinin və onun oğlanları Pirqasımın və Həmidin törəmələri indiki Pirverdiyevlər nəslinin nümayəndələridir.
Məhəmməd dədənin anası Fatimə Sarvanın Xasməmmədovlar nəslindəndir. Fatimənin Bayraməli adında qardaşı, Sədəf, Anaqız adında bacıları olub.
Məhəmməd Hacı oğlunun həyat yoldaşı
Mileyla Yaqubova (1914-1973) və Rüstəm Hacı oğlunun həyat yoldaşı Rahilə Yaqubova (1924 - 2009) bacıdırlar.
Onların ataları Hüseyn (Söyün) kişinin atası Yaqub, babası Hasan kişi olub.
Söyün kişi varlı adam olub, böyük torpaq sahələri, mal-qarası olub. Söyün Yaqub oğlunu 1940-cı illərdə qaçaqlar vurub.
Mileyla və Rahilənin anası Yetər Cümbül qızı ata tərəfdən Sarvanın Mustafalılar nəslindəndir, Abdulla Şaiqin qohumudur. Onların ata tərəfdən nənələri, yəni Söyün kişinin anası Molla Qızlarbəyim seyid nəslindəndir, savadlı və bilikli adam olub.
Yetər Cümbül qızının qardaşı dəyirmançı Məhəmmədin Vahid və Gümrah adında oğulları olub. Abbas Hacıyevin həyat yoldaşı Şahsənəmin ana qohumu (anası Gövhərin xalası) Güləmbər ilə Yetər xalaqızıdır.
Mileyla və Rahilənin Hümbət (tez rəhmətə gedib), Xəmməd (həyat yoldaşı – Məleykə, uşaqları Ziyad, Ziyafət, Hüseyn, Kifayət, Qiyafət, Elmira), Hasan (həyat yoldaşı – Məleykə, uşaqları Vaqif, Zakir, Zərifə, Sahibə, Gülşən), Mərsə (uşaqları Nizami, Nazilə, Nazim, Nazifə, Niyaz, Nəzakət), Şəmşi (Borçalı texnikumunu bitirib, savadlı və istedadlı adam olub, şeir yazıb, nakam sevdadan vurğun olub, 18 yaşında ölüb), İslam (həyat yoldaşı – Eminə, uşaqları Əsmayə, Gülnarə, Moruq, Bəsti, Vasif), Mərziyə (qəzadan şikəst olub, ailə qurmayıb), Zəhra (əri Nəsib, oğlu Ziyəddin) adında qardaş və bacıları olub.
Yetər Cümbül qızı Mustafalı
Mileyla ana (ortada) rəfiqələri ilə
Məhəmməd dədənin Rüstəmdən başqa, Abbas adında qardaşı, Nənəxanım və Gövhər adında bacıları olub. Ortancıl qardaş olan Abbas nişanlı olub, Soğanlıq kəndinə xalasıgilə qonaq gedərkən daşqında arabanı sudan çıxarmağa çalışıb, sel aparıb, 18 yaşında Kürdə batıb.
Məhəmməd və Rüstəm Hacıyevlər
22 noyabr 1939-cu il
Məhəmməd və Rüstəmin böyük bacıları Nənəxanım Sarvanda Cabbar kişi ilə ailə qurub, Qoca adlı bir oğlu olub. Qocanın övladları – Şaiq, Vahid, Şərqiyyə, Arif, Zakir, Sevil Nazim, Möylədir.
Məhəmməd və Rüstəmin kiçik bacıları Gövhərin əri əsli Qazaxın Şıxlı kəndindən olan, uşaqlığından ailəliklə Borçalıya köçmüş Şıxlı Məhəmməd olub. Onların oğlu Kəjdər igid adam olub, Borçalının məşhur qaçağı Cöyrü oğlu Qaranın dəstəsində qaçaqçılıq edib (Cöyrü oğlu Qara çar və sovet hökumətinə qarşı mübarizə aparıb, rus silahlıları, hərbi eşalonları ilə döyüşüb). Şıxlı Məhəmməd və Gövhərin qızları isə Müsəmbər və Leylandır. Leylanın əri Sarvanın Qara seyidlər nəslindən Mirsaleh olub.
Hacı Hacı oğlunun övladları Məhəmməd və Rüstəm əvvəllər Nayvəlioğlu soyadını daşıyıb, sonradan bu famili naibliklə bağlı olduğuna görə sovet hökumətinin təzyiqi ilə Hacıyevə dəyişiblər. Rüstəm Hacı oğlu Nayvəlinin adını yaşatmaq üçün bir müddət sənədlərdə soyadını “Nayvəlioğlu” kimi yazdırıb, müəllim və müharibə iştirakçısı olduğundan bu mümkün olub. 1980-ci illərin ortalarında "Hacıyev" soyadına keçib.
